Magapatigayon ang Senate Committee on Social Justice, Welfare, and Rural Development sang isa ka madalom nga pagtuon parte sa Juvenile Justice and Welfare Act.
Suno sa chairman sang komite nga si Sen. Erwin Tulfo, lakip sa ila pagatun-an amo ang kakulangan sang mga Bahay Pag-asa nga pasilidad para sa mga Children in Conflict with the Law, kag kon dapat man nga panagutin ang mga ginikanan bangud sang mga paglapas sang ila mga kabataan.
Gawas sini, pagatun-an man sang panel ang minimum age of criminal responsibility, nga sa subong yara sa 15 anyos, kag kon ini nagapabilin nga angay ukon praktikal pa.
Ginpahayag man sang senador nga antes pa siya nangin isa ka public servant, nasaksihan na niya ang mapintas nga kamatuoran sang Juvenile Law. Suno sa iya, sa sulod sang madamo nga tuig, may mga biktima sang krimen nga nahimo sang mga menor de edad nga wala sang mahimo bangud sa pagpatuman sang Juvenile Law.
