Ginkwestyon ni Senator-Judge Risa Hontiveros ang anay OVP Special Disbursing Officer (SDO) nga si Gina Acosta nahanungod sa recipient sang confidential funds nga ginapangalanan nga “Clarisse Hontiveros.”
Natukiban ni Hontiveros nga ang petsa sang pagbaton sang amo nga pondo amo ang Pebrero 24, 2023, nga amo man ang iya kaadlawan.
Suno kay Acosta, may mga ngalan sang recipient nga iya ginaberipikar anay kay anay ice Presidential Security and Protection Group head Col. Raymund Dante Lachica, apang ginmanduan siya sini nga confidential ang impormasyon.
Ginpahayag ni Acosta nga wala siya sang personal nga ihibalo kon may kaangtanan kay Sen. Hontiveros ang ngalan nga “Clarisse Hontiveros” ukon kon ngaa amo ang nakarekord nga petsa.
Ginkwestyon man ni Hontiveros kun si Acosta lang ang dapat manabat sa paggamit sang confidential funds bangod siya ang SDO kag nagbaton sang cash advance.
Suno kay Acosta, siya ang accountable officer, samtang si Lachica ang ginatudlo nga implementing officer nga nagadumala sang confidential activities sa field.
Gin-ako ni Acosta nga kulang ang iya ihibalo sa aktuwal nga pagpatuman sang mga operasyon, apang mahimo gihapon siya manabat kon may paglapas sa paggamit sang pondo.
Ginpahayag ni Acosta nga nahibaluan ni Vice President Sara Duterte ang iya mga ginahimo may kaangtanan sa confidential activities.
