Ginkalipay sang mga fans sang sikat nga Pinoy supergroup nga SB19 sang ginpakigbahin sang Japanese Youtube channel nga “The First Take” ang labing una nga performance sang grupo sang Lunes, Hulyo 1.
Gin-release sang The First Take bilang ika-449 nga episode sang nasambit nga channel ang performance sang SB19 kon sa diin makita nga nagasuksok ang mga members nga sanday Ken, Justin, Josh, Pablo, kag Stell sang green kag blue nga panapton kag ginkanta ang ila sikat nga kanta nga “GENTO”.
Isa ka sikat nga Youtube channel ang “The First Take” nga nagaimbitar sang mga singers kag musicians nga magkanta sa isa lang ka take, kag ang SB19 ang pinakauna nga Pinoy group nga nag-perform sa amo nga channel.
Sa subong, naglab-ot na sa masobra tunga sa milyon nga views sa Youtube ang nasambit nga video performance kag nagapadayon sa gihapon ang pag-trending sini sa social media platform nga X.
Nakilala ang grupo nga SB19 sa ila mga hit songs nga “What?”, “Bazinga” kag “Gento”.
