KORONADAL CITY – Padayon man nga ginaimbestigaran sang Banga PNP ang nasapwan nga bangkay sa bahin sang Bo. 3 sa nasambit nga banwa.
Ginpahayag ni PMaj. Joseph Forro, hepe sang Banga PNP nga nasapwan ang nasambit nga bangkay sa higad sang dalan kun sa diin base sa deskripsyon, isa ini ka lalaki, nakasuksok sang itom nga short, duag blue nga sweatshirt nga may hood, may yara sang tattoo kag gintabunan sang tape ang iya ulo kag tiil.
Suno kay Forro, posible nga may yara sang kaangtanan ang ini nga bangkay sa nasapwan man nga bangkay sa bahin sang Brgy. Roxas sa banwa sang Sto Nino, apang ginahulat pa nila ang dugang nga mga impormasyon agud maberipikar ang ginasiling nga kaangtanan sang duha nga insidente.
Dugang sang opisyal, may ginalantaw na sila nga motibo sa nasambit nga krimen kun sa diin ginapatihan nga kahimoan ini sang isa ka grupo ukon indibidwal.
Sa subong yara sa isa ka pribado nga funeral parlor ang nasambit nga bangkay samtang ginahulat ang pamilya sini.
