Patay ang siyam ka tawo kag indi magnubo sa 28 ang napilasan matapos maglunsyar ang Russia sang masobra 10 ka oras nga asod-asod nga pag-atake gamit ang missiles kag drones sa Ukraine.
Suno sa Ukrainian authorities, masobra 400 ka attack drones kag 110 ka missiles, lakip ang 27 ka ballistic missiles, ang ginlunsar sa nagkalain-lain nga lugar sa pungsod.
Lakip sa mga naguba ang mga taytay, pasilidad sang kuryente kag mga puluy-an.
Ginpahayag ni Ukrainian President Volodymyr Zelenskyy nga gintarget man ang mga pasilidad nga nagasuplay sang kuryente sa nuclear power plants kag nagakonektar sang power grid sang Ukraine sa mga pungsod nga sakop sang European Union (EU).
Bangud sini, ginkondenar niya ang paggamit sang cluster warheads kag ang sunod-sunod nga pag-atake nga suno sa iya nagapabudlay sa rescue operations kag pagkay-o sang mga naguba nga pasilidad.
Ginkondenar man ni NATO Secretary General Mark Rutte ang pag-atake, lakip ang nagalapad nga epekto sang kinagamo sa seguridad sang alyansa.
Bangod sini, nagpanawagan si Zelenskyy sa mga kaalyado nga padasigon ang paghatag sang dugang nga air defense systems kag PAC-2 kag PAC-3 missiles agud maproteheran ang Ukraine batok sa posible nga masunod nga mga pag-atake.













