Nagpahayag sang suporta ang isa ka amay kag pumuluyo sang Koronadal sa pag-amyenda sang Juvenile Justice Law agud mas mapanabat ang mga kabataan nga nagahimo sang kriminalidad.
Sa interview sang Bombo Radyo Koronadal kay Michael Pascual, ginpahayag niya nga dapat hatagan sang mas istrikto nga pagtan-aw ang implementasyon sang nasambit nga layi, ilabi na sa mga kaso nga nagalakip sang mga menor de edad nga nagahimo sang seryoso nga mga sala.
Suno kay Pascual, may ara sang responsibilidad ang mga ginikanan sa paggiya kag pagtudlo sa ila mga kabataan, bangud ang kakulang sang disiplina kag insakto nga pagdumala mahimo magresulta sa indi maayo nga mga desisyon, lakip na ang pag-upod sa kriminalidad kag pagagamit sang armas-luthang.
Ginpanawagan man niya nga kinahanglan pa hugtan ang seguridad sa mga buluthuan agud masiguro ang kaluwasan sang mga estudyante kag malikawan ang mga insidente nga mahimo magbutang sa peligro sa ila kabuhi.
Suno pa sa iya, kinahanglan nga may mas mabaskog nga mekanismo ang layi agud maghatag sang responsibilidad kag disiplina sa mga kabataan, kag malikawan ang pagpasakop nila sa mga delikado nga aktibidad.
Ginlaygayan man ni Pascual ang mga ginikanan nga padayon nga giyahan, tudluan, kag disiplinahon ang ila mga anak agud magdaku sila bilang responsable kag maayo nga mga miyembro sang komunidad.
