Pulis kag retirado nga suldado, gin-arestar bangud sa pagbaligya sang armas sa Tupi, South Cotabato

KORONADAL CITY – Yara na sa kustodiya sang mga otoridad ang isa ka pulis kag retirado nga suldado makaligad nga ma-arestar bangyud sa pagbaligya sang mga armas sa banwa sang Tupi, South Cotabato.

Suno sa report sang Tupi PNP, ginkilala ang mga suspek nga sanday Staff Sergeant Arnel Dionio, 44 anyos, may asawa, residente sang Barangay Poblacion, Alabel, Sarangani Province kag kasamtangan nga naka-appoint sa Police Security Protection Group ukon PSPG 12 sa General Santos City kag si Irineo Toribio, 44 anyos, retirado nga myembro sang Armed Forces of the Philippines kag residente sang Barangay New Society, General Santos City.

Nadakpan ang mga suspek makaligad nahibaloan sang mga otoridad pinaagi sa ila mga informant nga nagabaligya suno pa sang armas ang mga ini sa Barangay Polonuling, Tupi, South Cotabato.

Narekober sa posisyon sang mga ini ang isa ka Colt Carbine rifle nga armas nga may 5 ka bala kag isa ka bundle sang tag five hundred pesos bill nga gin-usar sa entrapment operation kag ang kotse nga nakarehistro suno pa sa isa ka Janice Cadungog sang San Isidro, General Santos City.

Sa subong, nagapangatubang na ang mga ini sang kaso nga paglapas sa RA 10951 ukon “Comprehensive Firearms and Ammunition Regulation Act.”.