KORONADAL CITY – Nagbato patay sa mga otoridad ang isa ka myembro sang South Cotabato Provincial Security Unit matapos ang ginkasa nga drug buybust operation sa banwa sang Polomolok, South Cotabato.
Ini ang ginkumpirmar ni Pol Col Joel Limson, hepe sang South Cotabato PNP sa esklusibo nga interbyu sang Bombo Radyo Koronadal.
Suno kay Limson, ginkilala ang suspek nga si Alfredo Polido Jr, 44-anyos, residente sang Lot 3, Yu Village, Brgy Apopong, General Santos City.
Ginpahayag sang opisyal nga gulpi lang suno pa nagbunot sang armas ang suspek sang mahibaluan nga pulis ang katransakyon sini rason agud nga gintiro ini sang mga otoridad sa Prk Maligaya, Brgy Pagalungan sang nasambit nga banwa.
Gindala na suno pa sa ospital si Polido apang gindeklarar nga dead on arrival.
Narekober naman sa posisyon sini ang 14 ka sachets sang suspected shabu, drug paraphernalia, cal. 38 nga armas, mga bala kag P1,000 na marked money.
Nahibaluan nga una na nga ginpahayag ni SoCot PSU Chief Elioterio Nodado nga gintiro si Polido sang riding in tandem suspek apang ginpaklaro naman ni Limson nga isa ka lehitimo nga operasyon ang ila nga ginpatigayon batuk sa nasambit nga PSU Member.
