Nagapati si anay Bureau of Internal Revenue (BIR) Commissioner Kim Henares nga simple lamang ang kontrobersiya may kaangtanan sa green box nga nagasulod sang tax records ni Vice President Sara Duterte kag sang iya bana nga si Atty. Manases Carpio.
Nahibaluan nga ginbalik ni Senator-judge Chiz Escudero ang amo nga kahon sa BIR Office sa Quezon City sang una nga adlaw sang impeachment trial batok kay VP Sara Duterte.
Suno kay Henares, kun luyag gamiton sang prosekusyon ang tax records sa impeachment trial, kinahanglan nila ipatawag bilang testigo ang BIR Commissioner.
Ginpaathag niya nga ang pagdumala kag pagpagwa sang tax records sang mga Pilipino, lakip na ang mga opisyal sang gobyerno, yara sa awtoridad sang BIR Commissioner suno sa layi.
Ginpahayag man niya nga kinahanglan may motion ukon subpoena halin sa impeachment court antes mapagwa ang sensitibo nga mga dokumento kag dapat sundon ang nagakaigo nga proseso.
Si Henares anay nagtestigo sa impeachment trial ni anay Chief Justice Renato Corona bilang kabahin sang House prosecution panel.
Suno pa kay Henares, indi dapat padalumon ang isyu sa green box kag sa pagpagwa sang tax records ni VP Sara Duterte.
Kun usaron man ini sang prosekusyon, kinahanglan lang sundon ang kasubong nga proseso nga ginhimo sang impeachment trial ni Corona.
