Ginhangkat ni House private prosecutor Atty. Lorna Kapunan ang defense panel ni Vice President Sara Duterte nga indi na kontrahon ang ginapangayo nga subpoena para sa tax kag bank records sang bise presidente.
Suno kay Kapunan, masami nga nagasiling ang depensa nga wala sang ebidensiya ang House prosecution, gani dapat tugutan nila ang pagpresentar sang tanan nga ebidensiya sa impeachment court sa baylo nga balabagan ang legal nga mga tikang sang prosecution.
Ginpahinumduman man sang abogado nga nagpahayag anay si VP Sara nga sa impeachment court niya sabton ang mga alegasyon batok sa iya.
Gani, ini na ang nagakaigo nga tiyempo para ipresentar sang depensa ang ila ebidensiya kag pamatud-an ang pagka-inosente sang bise presidente.
Dugang pa niya, ang impeachment court amo ang nagakaigo nga lugar agud mapresentar sang tagsa ka kampo ang ila mga ebidensiya kag mangin basehan sang mga senator-judge sa pagdesisyon sang kaso.
