Ginpasidunggan ni Historical Sites Development Officer II Eufemio Agbayani III sang National Historical Commission of the Philippines (NHCP) ang Pinay tennis star nga si Alex Eala bangud sang iya ginpakita nga mataas nga pagrespeto sa bandila sang Pilipinas.
Ini kasunod sang paglapta sang isa ka video nga nagapakita nga nagapangayo sang autograph ang mga tagahanga sang DC Open champion.
Isa sa mga fans ang naghangyo nga papirmahan ni Eala ang bandila sang Pilipinas, apang matinahuron ini nga ginbalibaran sang atleta.
Base sa Republic Act No. 8491 ukon Flag and Heraldic Code of the Philippines, hugot nga ginadumilian ang pagsulat ukon pagbutang sang bisan ano nga marka sa bandila ukon iban pa nga national symbol.
May pagaatubangon nga silot ang bisan sin-o nga maglapas sa sini nga probisyon.
Bisan dyutay lang nga binuhatan, dako ang mensahe sang ginhimo ni Eala kun sa diin ginpakita sini ang iya mabaskog nga pagrespeto sa bandila sang Pilipinas nga iya ginadala kag ginapasidunggan sa tagsa niya ka pagatubang sa mga kompetisyon sa sulod sang tennis court.
