Pinangunahan ni Pangulong Ferdinand R. Marcos Jr. ang isang gala dinner sa Malacañang bilang bahagi ng pagdiriwang ng ika-50 anibersaryo ng Treaty of Amity and Cooperation in Southeast Asia (TAC), isang kasunduang naglalayong palakasin ang kapayapaan, pagkakaisa, at pagtutulungan sa rehiyon.
Bilang kasalukuyang Chair ng ASEAN ngayong 2026, pinangunahan ng Pilipinas ang paggunita sa mahalagang kasunduan na unang nilagdaan noong 1976. Sa parehong araw ng selebrasyon, sumali rin sa TAC ang Sweden, Poland, Romania, at Lithuania, dahilan upang umabot na sa 62 ang kabuuang bilang ng mga bansang kasapi nito.
Sa kanyang mensahe, inihambing ni Pangulong Marcos ang diplomasya sa kulturang Pilipino ng pagsasalo sa hapag-kainan, kung saan nabubuo ang pagkakaunawaan sa pamamagitan ng bukas na pag-uusap. Aniya, tulad ng isang pamilyang nagkakaisa habang kumakain nang sama-sama, nakakamit din ng mga bansa ang kapayapaan sa pamamagitan ng dayalogo at kooperasyon.
Binalikan din ng Pangulo ang kasaysayan ng TAC at binanggit ang paglahok ng kanyang ama, dating Pangulong Ferdinand E. Marcos, bilang isa sa mga lumagda sa kasunduan noong 1976.
Ayon kay Marcos, nananatiling simbolo ang TAC ng tiwala at pag-asa para sa kinabukasan ng Timog-Silangang Asya sa kabila ng pagkakaiba-iba ng kultura, pananaw, at interes ng mga bansa. Iniuugnay rin niya ang mga prinsipyo ng kasunduan sa diwa ng bayanihan, na sumasalamin sa pagtutulungan at pagkakaisa ng mga Pilipino.
Bilang bahagi ng pagdiriwang, inilunsad ng Pilipinas ang isang commemorative postage stamp at opisyal na logo na hango sa sampaguita, na nagsisilbing sagisag ng limang dekada ng pagkakaibigan at kapayapaan sa rehiyon.
Sa pagtatapos ng programa, nanawagan si Pangulong Marcos sa mga lider na ipagpatuloy ang pagsusulong ng mga pagpapahalaga ng TAC sa pamamagitan ng tiwala, maayos na komunikasyon, at sama-samang pagkilos tungo sa mas matatag na ASEAN.
