KORONADAL CITY- Emosyonal nga nagpanawagan sang bulig pinaagi sa Bombo Radyo Koronadal si Pastor Isaac Piang, isa sa nilibo ka mga survors kag bakwit sa Makilala, North Cotabato nga buligan nga ma rescue ang pila pa ka mga residente sa ila barangay nga tubtob subong na trap suno pa sa gihapon makaligad ang mabaskog nga pagtay-og sang linog.
Sa ekslusibo nga interbyu sang Bombo Radyo Koronadal kay Pastor Piang, ginpahayag sini nga maswerte suno pa sila sang iya pamilya kag iban pa nga mga residente nga nakapanaog sa nabukid nga bahin sang Prk. 4 Brgy. Luayon, Makilala, North Cotabato antes pa man maglala ang landslide apang ginpahayag sini nga madamo pa ang mga wala makapanaog sa kabukiran kag posible nga na trap sa ila mga puluy-an ukon sa mga dalan samtang papanaog halin sa kabukiran.
Suno kay Pastor Piang, tuman ka damo suno pa nga residente nga naga istar sa nabukid nga bahin sang Makilala ang tubtob subong wala pa ma rescue.
Nahibaluan nga nilibo ka mga bakwit na subong ang yara sa open area nga tuman nga nagapanginahanglan sang bulig kasubong sang pagkaon, malimpyo nga tubig, bulong, bayo kag temporaryo nga ilistaran.
Emosyonal man sini ginlaragway ang sitwasyon nila nga naga antos sa katugnaw kada gab-i bangud wala sila sang nasalbar nga bayo pangontra sa lamig samtang nagatulog sa tent.
