KORONADAL CITY- Padayon nga gina-istoryahan sa probinsya sang South Cotabato kag sa iban nga lugar ang ginpagwa nga kalain sang buot ni Philippine Motocross champion Bornok Mangosong batuk sa organizer sang Motocross Competition sa South Cotabato kadungan sang 53rd Foundation anniversary kag 20th Tnalak Festival.
Madumduman nga sa ekslusibo nga interbyu sang Bombo Radyo Koronadal kay Mangosong angot sa pag-rant sini sa social media angot sa malain nga pagtratar suno pa sa iya sang organizer sang event makaligad wala gintugutan mag perform bangud sa protesta sang iban nga mga nagsali sa kompetisyon kun sa diin gintawag ni Mangosong nga wala sang word of honor ang organizer sang event.
Sa pihak nga bahin, ginpabulaanan ni Motocross committee chair at South Cotabato Board Member Larry De Pedro VI ang mga akusasyon ni Mangosong batuk sa organizer sang event kun sa diin gin insister sini nga wala suno pa nagsunod sa ila regulasyon si Mangosong kag napaslawan nga makaregister sa una nga adlaw sang kompetisyon nga nangin kabangdanan sang pagprotesta sang pila ka mga nagsali sa event.
Dugang pa sini nga ginbully man suno pa ni Mangosong ang pila ka mga bag-uhanon nga riders kag ginpamukha sa iya nga siya ang pinakamaayo.
Bangud sini, igapatawag si Mangosong agud istoryahan ang problema kag kun padayon pa sini nga pagagubaon ang Provincial Government igadeklarar na ini sa South Cotabato bilang persona non grata.
