KORONADAL CITY – Magpatigayon sang Kanduli ukon thanks giving ang Muslim community sa nakalain lain nga lugar sa pungsod kaupod na ang South Cotabato sa pagsaulog sang Islamic New Year ukon ang Amun Jadid celebration subong nga adlaw.
Ini ang pahayag ni South Cotabato Muslim Affairs Chief Sultan Mutalib Sambuto sa interbyu sang Bombo Radyo Koronadal.
Suno kay Sambuto, pag-laum ang dala sang selebrasyong ini sa tanan nga mga Muslim sa bug-os nga kalibutan labi na sa subong nga nagapangatubang ang lugar sang Covid-19 pandemic.
Apang bangud sa pandemic nga mangin limitado ang mga tao sa mosque kag kinahanglan nga magsunod sa mga health protocols kasubong sang social distancing, pagsuksok sang face mask kag face shield.
Indi kasubong nga naanaran sang mga ini indi mahimo nga magtipon ang kadam-an nga mga kauturan naton nga mga Muslim sa isa ka lugar para sa selebrasyon.
Sa pinak sini, mangin parte nalang sa pag pangamuyo sang Muslim community ang pagdula sang virus.
Kasubong sa mga kristiyano naga serbe ang Islamic New Year agod magbag-o ang kada Muslim sa ila nga kabuhi labi na ang mga nakasala kag mga malain nga ginahimo sang mga ini.
Ginpasirado naman ang tanan nga mga ahensya sang gobyerno subong nga adlaw sa South Cotabato bilang pagkigbuy-log sa nasambit nga selebrasyon.
