Ginakabig ni South Cotabato 2nd District Representative kag Deputy Speaker for Mindanao Ferdinand Hernandez nga desperado nga solusyon para sa desperado nga sitwasyon ang pagdihon sang gin-aprubahan nga House Bill 6616 agud matapna ang pamahog sang coronavirus disease sa Pilipinas.
Sa eksklusibo nga interbyu sang Bombo Radyo Koronadal kay Cong. Hernandez, ini ang nakit-an nila nga solusyon agud masolusyunan ang krisis sang pungsod halin sa nasambit nga epidemiya.
Dugang pa sang kongresista, nagakadapat na lang nga maghiliusa ang tanan ilabi na isa lang ang kontra naton kag indi ini makit-an, kag ginahanglan man nga magpangamuyo nga kontane matapos na ang krisi nga ini.
Madumduman nga sa boto nga 289 ang Yes, 9 ang No, kag 0 ang abstain, gin-aprubahan sang Kamara ang Bayanihan to heal as One Act nga nagatalana sang deklarasyon sang national emergency sa bug-os nga pungsod.
Yara sa hagna sandig sa Article VI, Section 23(2) sang Saligang Batas,nga pinaagi sa Kongreso, ginapahanugutan ang pangulo nga usaron ang emergency power sa tion nga may emergency power.
