KORONADAL CITY- Ginkalipay ni South Cotabato Governor Daisy Avance Fuentes ang paghagan-hagan sang Kriminal kag Insurgency Rate sa bugos nga probinsya sang South Cotabato.
Ini matapos nga gintawag nga Generally Peaceful ang probinsya sang South Cotabato ni Provincial Police Director PSSUPT Nestor Salcedo sandig sa datus nga uyat sang Kapulisan.
Kun sa diin, nagnubo ang Numero sang Kriminalidad para sa First Quarter sang tuig 2018 magluwas na lang sa presensya sang mga Local Terrorist subong sang New People’s Army.
Suno kay PD Salcedo, ang NPA ang nagapabilin nga pamahog sa Peace and Order sa pila ka bahin sang South Cotabato.
Apang sa piyak sini, ginpasigurado ni PD Salcedo nga padayon ang hugot nga Integrity Patrol System sang PNP batok sa mga Lawless Elements sa bulig man sang Armadong Kusog sang Pilipinas.
Samtang, nagapanagbay man Si South Gov. Fuentes sa padayon kag hugot nga pagbantay sang Kapulisan sa Probinsya mangin ang padayon nga pagkooperar sang Kasuldaduhan agod nga mapabilin ang Peace and Order sa kabugusan nga South Cotabato.
Angot sini, ginpahinumduman sang Gobernadora ang tanan nga Kapulisan nga maghalong sa tanan nga operasyon kag pagasiguraduhon nga ensakto ang ginahimo nga aksyon agod nga indi mapamatbatan sang Commission on Human Rights ukon CHR.
