Isa ka lalaki nga ginakabig nga suspek sa pagpangawat sang motorsiklo ukon carjacking ang nadakpan sang kapulisan sa ginpatigayon nga hot pursuit operation sa Banga, South Cotabato, sang kaagahon sang Martes, Oktubre 27, 2026.
Narekober man sa operasyon ang duha ka motorsiklo nga ginapatihan may kaangtanan sa insidente, isa ka kalibre .357 nga pistola nga may lima ka buhi nga bala, isa ka fired cartridge, isa ka MK2 fragmentation grenade, kag duha ka sachet sang ginapatihan shabu.
Suno sa spot report sang Banga Municipal Police Station, nakabaton ang kapulisan sang flash alarm halin sa Koronadal City Police Station sang mga alas-2:50 sang kaagahon parte sa insidente sang carjacking sa Barangay Magsaysay, Polomolok, South Cotabato.
Gilayon nga nagpatigayon sang koordinado nga operasyon ang composite team nga ginkompwesto sang mga personnel sang Banga MPS, Regional Mobile Force Battalion 12, 2nd Vanguard Alpha patrollers, intelligence operatives sang South Cotabato Police Provincial Intelligence Unit, Tracker Team Charlie sang Regional Intelligence Division 12, Polomolok MPS kag South Cotabato Highway Patrol Team.
Sa idalom sang personal nga pagdumala ni Police Colonel Isr ael Z. Lauren, Provincial Director sang South Cotabato Police Provincial Office, ginkasa ang koordinado nga dragnet operation agud madakpan ang mga suspek.
Sa tion sang operasyon, na-intercept ang duha ka motorsiklo—isa ka gray nga Kawasaki KLX 150 nga may plate number M885HT kag isa ka gray-blue nga Yamaha Aerox 155 nga may plate number 287MEQ.
Ginasakyan sang duha ka lalaki ang Kawasaki, samtang tatlo ka wala pa makilala nga lalaki ang sakay sang Yamaha. Apang, sang ginpahunong sang kapulisan, wala nagsunod ang mga suspek sa ginpatuman nga checkpoint kag nagpalagyo pakadto sa Purok Candijay, Sitio Valencia, Barangay San Vicente, Banga, antes nagbulagay kag nagpalagyo sa nagkalain-lain nga direksyon.
Paagi sa madasig nga pagresponde kag koordinasyon sang nagkalain-lain nga operating units, nadakpan ang isa sa mga suspek nga ginkilala sa spot report nga si Bullet Kusain Mama.
Lakip sa mga narekober sa operasyon ang isa ka unit sang .357 caliber pistol nga may lima ka buhi nga bala, isa ka fired .357 caliber cartridge, isa ka MK2 fragmentation grenade, kag duha ka heat-sealed transparent plastic sachet nga may ginapatihan shabu nga may kabug-aton nga 2.34 gramos kag ginabulubanta nga balor nga P15,912.
Narekober man ang duha ka nasambit nga motorsiklo kag isa ka Samsung Galaxy A56 5G nga cellphone.
Ginpabug-atan sang kapulisan nga ang madali nga pagresponde kag koordinasyon sang mga nag-upod nga yunit nangin importante sa pagdakop sang isa ka suspek kag pagrekober sang mga motorsiklo kag iban pa nga mga ebidensya.
Padayon naman ang imbestigasyon sang mga awtoridad agud matumod ang iban pa nga mga suspek kag matino ang bug-os nga mga sirkumstansya sang insidente.
