Mabaskog nga ginapamatukan sang Convergence of Initiatives for Environmental Justice ang mining operation sa Tampakan kag ginapanawagan nga indi pagibaylo ang natural resources kag rice production sang banwa sa isa ka proyekto nga mahimo.
Sa interview sang Bombo Radyo Koronadal kay Rene Pamplona, Project Coordinator sang CIEJ, iya ginpabutyag ang kabalaka sang grupo sa posible nga epekto sang proyekto, ilabi na sa suplay sang tubig nga importante sa sektor sang agrikultura.
Suno kay Pamplona, nahimo magdala sang malawig nga epekto sa palibot kag sa kabuhi sang mga residente.
Gani, kinahanglan suno sa iya, nga konsiderahon indi lamang ang mahimo nga economic benefits sang proyekto lakip man ang epekto sini sa pangabuhian kag agrikultura sang mga residente.
Bangud sini, ginaduso ni Pamplona nga dapat balansehon sang maayo ang posible nga benepisyo sang mining project batok sa malawig nga epekto sini sa suplay sang tubig, agrikultura, palibot kag pangabuhian sang komunidad.
Madumduman nga nauna na nga ginpaklaro ni Tampakan Mayor Leonard Escobillo, sa interview sang Bombo Radyo Koronadal nga wala ginasuportahan sang lokal nga panguluhan ang proyekto sa masunod nga duha tubtob tatlo ka tuig.
Suno sa alkalde, wala man nagakoordinar sa iya administrasyon ang mining company humalin sang iya pagpungko.
Ginpaklaro man ni Escobillo nga ang road widening kag compaction work sa lugar indi nagakahulugan nga naghatag na sang go signal ang LGU para sa operasyon sang proyekto.
Kabahin lamang ini, suno sa iya, sang mga obligasyon sang kumpanya sa idalum sang Financial and Technical Assistance Agreement ukon FTAA, lakip ang pagtukod sang kaugalingon sini nga access roads.
Samtang, ginaduso sang lokal nga panguluhan ang Forest Land Use Plan kag Comprehensive Land Use Plan nga nagahatag sang prayoridad sa pagpreserbar sang mga kagulangan kag forest reserves.
Padayon man ang monitoring sang LGU sa mga illegal mining activities sa banwa kada 15 ka adlaw.
