KORONADAL CITY– Dako nga palamangkutanon para sa mga himata sang isa ka Overseas Filipino Worker ang pagkatukib sang bangkay sini nga nagalutaw lutaw sa gilid sang dagat sa Butterfly beach resort sa Hong Kong.
Nahibaluan nga nag abot na sa Brgy. San Vicente, Sto. Nino, South Cotabato ang bangkay sang OFW nga si Jenny Lacson makaligad masapwan ang bangkay sini sa kilid sang dagat.
Sa interbyu sang Bombo Radyo Koronadal kay Rihanna Lacson, tiya sang biktima, antes pa man ang panghitabo nag istorya suno pa sila nga magkitaay sa lugar kun sa diin ini naga ubra apang wala siya ginsipot ni Jenny.
Nahibaluan nga nagpadulong suno pa sa beach si Jenny apang namissing suno pa ini base sa isa ka Juliet Dela Cruz nga nagpanawag sa tiya sang biktima kun sa diin sa una nga imbestigasyon, madamo sang bersyon ang nagwa kun paano na-missing ang Pinay DH kasubong sang may kaupod suno pa ini nga tatlo ka persona kag may bersyon man nag nahubog ini.
Gingamitan pa sang helicopter sang mga rescuers ang pagpangita sa biktima tubtpb sa nasapwan ini nga palutaw-lutaw sa gilid sang dagat.
Sa karon ginakahadlukan nga posible ginhungod nga lunuron si Jenny kun sa diin nag apela sang bulig ang pamilya sang biktima sa gobyerno agud mahibaluan ang kamatuoran.
