Nagpaandam ang National Telecommunications Commission (NTC) Region 12 sa publiko batok sa ginatawag nga “MC Catcher”, nga suno sa ahensya mahimo gamiton sang mga scammers sa pagkuha sang importante kag sensitibo nga impormasyon paagi sa SIM cards sang mga biktima.
Sa interview sang Bombo Radyo Koronadal kay Engineer I Johanna C. Jumao-as, sang NTC Region 12, ginpaathag sini ang publiko nga mangin mabinantayon sa mga pamaagi nga ginagamit sang mga manugpangscam, ilabi na sa paggamit sang cellphone kag iban pa nga electronic gadgets.
Suno kay Jumao-as, ang MC Catcher mahimo magamit sa pag-intercept ukon pagkuha sang impormasyon nga nagaagi sa mobile communication, gani importante nga mangin alerto ang publiko kag maghalong sa mga makadududa nga mensahe, links, kag iban pa nga online nga transaksyon.
Samtang, padayon ang pagpatigayon sang NTC Region 12 sang information drive sa nagkalain-lain nga lugar sa rehiyon bilang kabahin sang kampanya sang ahensya batok sa nagkalain-lain nga klase sang scam.
Lakip sa mga ginahatagan sang impormasyon kag pagpaandam sa publiko amo ang investment scam, text scam, account scam, online shopping scam, kag love scam.
Pinaagi sa sini nga information drive, ginapalapta sang NTC-12 ang nagakaigo nga impormasyon agud mapataas ang kaalam sang publiko kag malikawan ang pagkabiktima sang mga manugpangscam.
