Nagtaliwan na ang two-time Grammy Award-winning American jazz singer, songwriter kag producer nga si Cassandra Wilson sa edad nga 70 anyos.
Suno sa iya longtime manager nga si Robert Torre, nagtaliwan si Wilson sa iya puluy-an sa Jackson, Mississippi.
Nakilala si Wilson sa iya madalom kag talulupangdon nga contralto voice kag sa pamaagi sang pagtingub niya sang jazz, blues, folk, country kag R&B sa iya mga ambahanon.
Lakip sa mga nangin madinalag-on niya nga album ang New Moon Daughter, nga nakakuha sang Grammy Award para sa Best Jazz Vocal Album, kag Loverly, nga naghatag sa iya sang ikaduha nga Grammy sa kasubong nga kategorya.
Sang 2001, ginkabig siya sang isa ka magazine nga “America’s Best Singer,” samtang sang 2022 ginkilala man siya bilang National Endowment for the Arts Jazz Master, isa sa pinakamataas nga pagkilala sa patag sang jazz sa Estados Unidos.
Nangin kabahin man si Wilson sang Blood on the Fields ni Wynton Marsalis, ang una nga jazz work nga nagdaog sang Pulitzer Prize for Music sang 1997.
Ginhingyo naman sang pamilya kag mga abyan ni Wilson ang privacy samtang nagapangasubo sila sa pagkadula sang nasambit nga singer.
