KORONADAL CITY – Nagatipon na ang mga katapu sang Moro National Liberation Front (MNLF) sa probinsiya sang South Cotabato agud nga magpreparar para sa reinforcement batuk sa Maute terror group nga padayon nga nagapakig-away sa mga suldado sa siyudad sang Marawi.
Ini ang ginpahayag ni Police Senior Superintendent Franklin Alvero, police provincial director ng South Cotabato sa interbyu sang Bombo Radyo Koronadal.
Suno kay Alvero, pahanugutan nga magpabilin sa Barangay Saravia, Koronadal City ang grupo sang MNLF-Nur Misuari faction sa kondisyon nga sundon sang mga ini ang mga nahisgutan sa ginpatigayon nga dialogo.
Nahibaluan nga nag-atubangay sa barangay hall sang Saravia sanday Barangay Kapitan Gregorio Presga, MNLF Kumander Sangki Akmad, PD Alvero, Lt. Col. Benjamin Leander sang 27th IB at legal officer sang City agud nga istoryahan ang ginaduso sang MNLF nga magtukod sang kampo sa nasambit nga lugar.
Sa nasambit nga dialogo, nahisgutan nga indi mahimo magtukod sang kampo ang grupo sa lugar, indi magsuksok sang ila nga uniporme, indi magdala sang armas kag indi magtindog sang MNLF flag.
Sa tion nga may pagtililipon ang mga ini kinahanglan nga magkuha sang permit sa barangay kag magsumiter sang listahan sang mga miyembro nga magatambong.
Kinahanglan man nga ipahibalo sang grupo ang tanan nga aktibidad sa barangay.
Ginpahayag pa sang opisyal nga ang nasambit nga MNLF group ang grupo man nareport sa banwa sang Banga nga nagpatigayon sang collection kag recruitment.
Sa bahin naman ni MNLF Kumander Akmad, sa siyudad sang Koronadal sila sa subong bangud nagahulat sila sang mandu para sa reinforcement sa Marawi City batuk sa Maute Group.
Nahibaluan nga na sa masobra 160 ka mga miyembro, 16 na lamang ang willing nga magpadulong sa Marawi matapos nga mag-isol ang iban sa ila.
Una diri, nagtuga sang kahadlok sa mga pumuluyo sa Koronadal ang nareport nga nagtukod sang kampo sa Saravia ang grupo sang armado.
