KORONADAL CITY – Nagapadayon ang imbestigasyon sang mga otoridad sa nagluntad nga pag-utas sang kaugalingon nga kabuhi sang isa ka Mister sa atubangan mismo sang iya duha ka bata sa probinsiya sang North Cotabato.
Ginkilala ang nagpakamatay nga si Gibson Duran nga residente sang Sitio Lukiki, Brgy., Malatab, Antipas, North Cotabato.
Ginpahayag ni SPO3 Joel Peñaloza sang Antipas PNP, nga naabtanan nila ang biktima nga nakabitay usar ang isa lubid nga ginhigot mismo sini sa kisame sang ila nga puluy-an.
Naguwa sa imbestigasyon sang kapulisan nga antes naghikog si Duran nag-upod pa ini sa pag-inom sa iya mga abyan nga sanday Jose Ronnie Agacite kag Henricky Arroyo sa ila nga puluy-an.
Samtang nagainom upod ang mga abyan ginpahayag sini nga nagabatyag siya sang tuman nga kahidlaw sa iya nga misis nga yara sa abroad.
Ginpakigbahin pa sini nga luyag niya man ilakip sa paghikog ang iya duha ka mga bata butang nga ginlaygayan ini sang abyan nga sala ang iya ginaisip.
Ginpakalma pa sang iya mga abyan si Duran antes nga nagpauli apang wala sila naglaum nga dayunon sini ang iya nga plano nga paghikog.
