Ginpabutyag sang isa ka tricycle driver sa syudad sang Koronadal nga dako ang epekto ang halos kada Martes nga pagsaka sang presyo sang petrolyo.
Sa exclusive interview sang Bombo Radyo Koronadal kay Tatay Cleofe, isa ka tricycle driver, iya ginpahayag nga padayon gihapon ang ila pagpaningkamot sa pagbyahe sa adlaw-adlaw apisar indi na mapunggan ang padayon nga pagsaka sang presyo sang gatong.
Suno kay Tatay Cleofe, halin sa P150 nga ginatubil niya sa iya traysikol, nagdangat na subong sa P350 sa kada byahe niya.
Ginpahayag man niya nga pigado man ang ila pagbyahe subong bangud sa dyutay lang nga numero sang mga pasahero kumpara sa kadumuon sang traysikol sa syudad nga nagapamsada sa kada adlaw.
Bangud sini, ginatinguhaan na lang ni Tatay Cleofe nga budgeton ang iya kita nga P800 kada adlaw para sa kinahanglanon kag pagkaon sang iya pamilya kag kabataan nga yara sa kolehiyo.
Nagpanawagan si Tatay Cleofe sa gobyerno nga maghimo sang layi ukon mga pamaagi agud mapanubuan ang presyo sang gatong agud mahagan-hagan man ang epekto sini sa katawhan ilabi na kasubong nila nga yara sa sektor sang transportasyon.
