KORONADAL CITY – Ginpasiguro sang South Cotabato Police Provincial Office nga pagatutokan ang isyu sang ginaaligar nga pagpabudlay sa pila ka mga quarantine violators sa siyudad sang Koronadal kun sa diin pila ka mga pulis ang naulamid diri sa bahin sang Brgy. San Jose.
Sa interbyu sang Bombo Radyo Koronadal kay police provincial director Col. Jemuel Siason, maid-id na nila nga ginaimbestigahan ang nasambit nga isyu kun sa diin luyag nila nga mahibaloan kun sin-o nga mga pulis ang nalamita sa pagtorture suno pa sa SK secretary sang Brgy. Rotunda nga si Noel Gregorio kag mga kaabyanan sini.
Suno kay Siason, wala ginapahanugotan sa idalom sang pagsulondan sang ECQ ang pisikal nga pagpanakit bilang pamaagi sang pagsilot sa mga nagalapas diri.
Ila man nga ginalantaw ang alegasyon ni Gregorio nga hubog suno pa ang mga pulis sang ginhimo ang pagpabudlay.
Dugang sang opisyal nga ila pagatumanon ang due process sa imbestigsayon kag pagapasakaan sang kaso nga administratibo kun mapamatud-an nga nakasala ang mga pulis.
Suno naman kay Atty. Keysie Gomez, ang spokesperson sang CHR-12, ila nga pagabuligan ang mga reklamante sa pagsang-at sang kaso kun mapamatud-an ang alegasyon sang mga biktima labi na nga nagapanguna sa ila prayoridad ang paghatag sang hustisya sa mga biktima sang torture.
