Nasubuan man ang mga Pinoy sa pungsod Kuwait sa natabo nga trahedya sa pagkasunog sang isa ka residential building nga nagaserbe nga dormitoryo sang mga construction workers kun diin kalakip diri ang tatlo ka mga Overseas Filipino Workers.
Ini ang ginpahayag ni Evangeline Perante, Bombo International Correspondent to Kuwait sa interview sang Bombo Radyo Koronadal.
Ang mga napatay amo sanday Engr. Edwin Petilla, isa ka quantity surveyor, Jesus Lopez, iron worker kag Jeffrey Catubay nga isa naman ka document controller.
Ang mga ini ang una nga ginpaidalom sa intensive care unit (ICU) sa Adan Hospital apang ginbawian sang kabuhi.
Dugang pa ni Perante, nga ginpasiguro naman ni Sec. Hans Leo Cacdac, tiglikom sang Department of Migrants Workers nga magahatag sila sang nagakaigo nga bulig sa tanan nga biktima lakip na sa mga nabilin nga Mahal sa kabuhi sang mga biktima.
Ang bulig ang pagalakipan sang educational kag medical support subong man financial assistance.
Madumduman nga yara sa 49 ka mga tawo ang napatay bangud sa pagkasunog sang dormitoryo sang mga biktima.
Ginabulubanta naman nga yara sa masobra 2,000 ka mga tawo ang nagaistar sa nasambit nga edifisyo.
Sa karon, ginasuguran na ang pagproseso para sa repatriation sang mga bangkay.
