-- ADVERTISEMENT --

Padayon ang pagpanawagan sang hustisya sang mga pamilya sang mga biktima sang Maguindanao Massacre bisan 17 ka tuig na ang nagligad halin sang natabo ang masululubo nga trahedya.

Sa interview sang Bombo Radyo Koronadal kay Jan Chiene Maravilla, anak ni late Bombo Bart Maravilla, Chief of Reporters sang Bombo Radyo Koronadal, ginpahayag sini nga wala gihapon untat ang ila pagpakigbato para sa bug-os nga hustisya, indi lamang para sa iya amay kundi para man sa tanan nga pamilya sang mga biktima sang massacre.

Suno kay Maravilla, bangud sa naguba nga dalan pakadto sa lugar kun sa diin natabo ang massacre, ginapili na lamang nila nga magtililipon sa General Santos City agud sa gihapon madumduman ang ila mga pinalangga.

Kabahin sang ila aktibidad ang paghiwat sang misa kag forum kaupod ang iban nga mga pamilya sang mga biktima kag ang ila abogado, agud maistoryahan ang paghinun-anon bahin sa kaso kag mapakigbahin ang mga bag-o nga impormasyon nga ila nahibaluan.

Gindugang pa ni Maravilla nga padayon nila nga ginadumdom kag ginabisitahan ang handumanan sang iya amay, kag wala sila untat sa pagpangayo sang hustisya para sa tanan nga nadulaan sang kabuhi sa amo nga trahedya.