KORONADAL CITY – Suportado sang mga overseas Filipino workers (OFW) sa pungsod Japan ang pagpungko ni Yoshihide Suga bilang panibag-o nga prime minister sang nasambit nga pungsod.
Ini ang ginpakigbahin ni Bombo international correspondent Sunbeam Tanaka Raniguchi, 29 ka tuig na nga nagapuyo sa Japan kag tumandok sang Tboli, South Cotabato sa interbyu sang Bombo Radyo Koronadal.
Suno kay Raniguchi, angay kag may kalidad suno pa nga mangin lider sang Japan si Suga bangud sa kadugayon na sini sa gobyerno kag madamo man sang ihibalo sa patag sang politika.
Ini bangud si Yoshihide ang nangin tuo nga kamot sang duha ka nakaligad nga lideres sa Japan sang malawig nga tion.
Dugang pa ni Raniguchi, nga nagapati siya nga dako pa ang mahatag nga pamaagi sang bag-o nga prime minister agud mag-uswag pa ang pungsod.
Ginlauman man nila ang pila ka mga proyekto kag programa sa idalom sang pagpamuno ni Prime Minister Suga.
Kung madumdoman kahapon lamang sang gindesignar bilang bag-o nga prime minister si Suga nga nagtal-os sa pwesto nga si former prime minister Shinzo Abe bangud sa isyu sang balatian.
