KORONADAL CITY – Yara na sa kustodiya sang mga otoridad ang nagkalain-lain nga sahi sang mabaskog nga armas luthang nga nakumpiskar sa ginpatigayon nga law enforcement operation sang gintingob nga pwersa sang 57IB kag 21st Mechanized Company, 2nd Mechanized Infantry Battalion, Philippine Army sa Brgy Meta, Datu Unsay, Maguindanao.
Kalakip sa mga narekober ang M16 rifle, duha ka M203 grenade launcher, Carbine, twelve gauge shotgun, mga assorted magazines kag pila ka mga war materials sa puluy-an sang isa ka nagahingalan kay Tunga Pindilang, nga suno pa katapu sang Bangsamoro Islamic Freedom Fighters ukon BIFF.
Ang nasambit nga operasiyon ang ginpatigayon makaligad nga may isa ka sibilyan ang nagreport sa mga suldado nga nakit-an sang mga ini ang mga armado nga sanday Tunga Pindilang kag Kaliong Pansadalan Limba nga madugay na nga ginapangita sang mga otoridad.
Gilayon naman nga ginsalakay ang lugar kag nakuha ang nasambit nga mga high powered fire arms apang nakapalagyo ang mga suspek.
Sa subong, nagapadayon ang hot pursuit operation sa mga suspek.
Madumduman nga una na naguwa ang report nga ang mga katapu sang BIFF sa probinsiya sang Maguindanao kag Sultan Kudarat ang nakig-alyansa sa Maute terror group nga nagpatigayon sang pag-ataike sa Marawi City.
