KORONADAL CITY- Naglab-ot na sa halos 30 mil ka mga estudyante ang apektado sa engkwentro sa tunga sang mga suldado sang gobyerno kag Bangsamoro Islamic Freedom Fighters (BIFF) sa Pigcawayan, North Cotabato humalin kahapon.
Sa interbyu sang Bombo Radyo Koronadal kay North Cotabato Schools Division Superintendent Omar Obas indi lamang ang banwa sang Pigcawayan, North Cotabato ang nagdeklarar sang suspension of classes apang lakip naman ang banwa sang Midsayap, North Cotabato kag posible nga madugangan pa.
Ang pagsuspender sang klase ang tuga sang kahadlok sang mga ginikanan nga pasudlon sa mga buluthuan ang ila nga mga bata bangud sa natabo nga engkwentro.
Dugang pa sini nga sa subong prayoridad sang DepEd ang kaluwasan sang mga esudyante kag mga manunudlo kun diin ginmanduy na nga makaangkon sang evacuation center sa West District kag maghatag sang Emergency education sa mga kabataan lakip na ang pagpaidalom sa Psychological briefing sa mga nakaeksperiensiya sang trauma bangud sa kinagamo.
