Masobra 2 ka libo nga pamilya nga apektado sang magnitude 6.3 nga linog sa Region 12, ginpaidalom sa psychosocial intervention

KORONADAL CITY – Padayon nga ginapaidalom sa psychosocial intervention ang mga residente sa mga lugar sa South Cotabato kag North Cotabato nga apektado sang magnitude 6.3 nga lindol kag aftershocks.

Sa interbyu sang Bombo Radyo Koronadal kay OCD 12 Assistant Regional Director Jerome Barranco, ginpatigayon na ang stress debriefing sa mga residente nga nakabatyag sang mabaskog nga linog kag naka-angkon sang trauma.

Kadungan sini, ginlaygayan man ni Barranco ang publiko nga likawan ang pagpalapta sang sala nga imprormasyon pinaagi sa text kag sa social media.

Gin-awhag man sini ang publiko nga magpati lang sa mga berepikado nga report halin sa mga ahensiya sang gobyerno kag mga lehetimo nga media entities.