Ginpahayag ni George Villalon Jr., isa sa 18 nga ginatawag nga “maleta boys,” nga gintanyagan sila sang P20 milyon tubtob P25 milyon agud i-recant ukon bawion ang ila mga salaysay nga nagaulamid sa pila ka opisyal sang gobyerno sa ginapatihan nga korapsiyon sa flood control projects.
Ginhimo ni Villalon ang pahayag matapos magpirma sang recantation affidavits ang apat sa ila mga kaupod kag nag-angkon nga wala sang kamatuoran ang ila orihinal nga joint affidavit.
Apang wala ginpahayag ni Villalon kun sin-o ang naghalad sang amo nga dako nga kantidad sang kwarta para sa ila pag-recant.
Ginpanginwala man niya nga may iban pa sa ila grupo nga nagaplano mag-atras sang ila mga affidavit.
Suno sa iya, nagapabilin ang ila panindugan sa kamatuoran sang ila mga nauna nga salaysay.
Naghatag man si Villalon sang mensahe sa iya mga kaupod nga nag-recant kag ginpahayag nga dapat nila ginbalanse sang maayo ang ila desisyon, ilabi na ang pagbaton sang kwarta.
Samtang, ginpanginwala na antes ni Atty. Levito Baligod ang alegasyon sang apat ka “maleta boys” nga gin-gamit niya ang ila mga pahayag para makakwarta.
Madumduman nga ginpakilala ni Baligod sang Pebrero ang 18 ka anay Marines nga gin-alegar anay nagserbi bilang mga bagman ni anay Rep. Zaldy Co sa pagdala sang ginapatihan nga kickbacks nga naghalin sa mga flood control projects.
