Ginpangabay ni Atty. Levito “Levy” Baligod sa Department of Justice (DOJ) nga mag-inhibit kag ibasura ang tanan nga reklamo nga libel kag cyber-libel nga ginpasaka batok sa iya kag sa 18 ka anay bodyguards ni anay Ako Bicol Party-list Rep. Zaldy Co.
Suno kay Baligod, dapat indi anay magpadayon ang DOJ sa mga reklamo bangud ginaiimbestigaran naman sang Office of the Ombudsman ang kasubong nga mga alegasyon.
Ginsiling niya nga posible ini magresulta sa magkalain-lain nga resolusyon bangud kasubong nga independent kag co-equal bodies ang DOJ kag Ombudsman.
Nagapati man siya nga ang paggamit sang Ombudsman sa joint affidavit nga ginpasakop sang Pebrero nagapakita nga ginahatagan ini sang kredibilidad kag nagakaigo nga usisaon.
Gani, ginpangayo ni Baligod nga ipaubaya na lamang sa Ombudsman ang pagpadayon sang imbestigasyon.
Dugang pa niya, siyam na ka anay suldado ang na-interview sang Ombudsman may kaangtanan sa ila mga alegasyon nga may mga indibidwal kag opisyal nga nakabaton sang mga maleta nga may unod nga kuwarta.
Madumduman nga pagkatapos nila ipublikar ang ila mga pahayag kag alegasyon, ginpasakaan sila sang nagkalain-lain nga reklamo nga libel kag cyber-libel.
Ginkumpirmar man ni Baligod nga matambong sila sa pagdinig sang Senate Blue Ribbon Committee nga ginapamunuan ni Senador Erwin Tulfo may kaangtanan sa imbestigasyon sang ginapaathag nga maanomalya nga mga infrastructure projects sang gobyerno.
Sa subong, wala pa sang opisyal nga pahayag ang Ombudsman bahin sa iya ginpahayag.
