Gintawag sang Malacañang nga dalok si Vice President Sara Duterte matapos niya ipahayag nga indi siya luyag magbulig kay Presidente Ferdinand Marcos Jr. sa iya handum nga mabaligya ang bugas sa P20 kada kilo.
Ginsiling ni VP Sara nga may nabal-an siya nga paagi agud mabaligya ang bugas sa P20 kada kilo, apang indi niya ini luyag ipahibalo.
Bilang sabat sa pahayag, nagsiling si Palace Press Officer kag PCO Undersecretary Claire Castro nga daw bata ang pamatasan sang bise presidente.
Suno kay Castro, indi playground ang gobyerno para sa mga tao nga daw isip-bata pareho sang bise presidente.
Gindugang pa ni Castro nga sa ginpakita nga hilikuton ni VP Sara, nagagwa ang iya matuod-tuod nga kinaiya bilang isa ka public servant.
Ginpanugyan ni Castro nga ang kapakanan sang pumuluyo dapat ang una nga ginapaminsar, labi na subong nga madamo sa mga Pilipino ang nagaantos kag indi gani makabakal sang pagkaon bisan barato lang nga bugas.
Dapat, suno kay Castro, paminsaron sang bise presidente nga ang serbisyo publiko indi isa ka hampang.
Ang pagbulig sa mga pigado nga Pilipino paagi sa mga serbisyo pareho sang barato nga bugas, indi dapat ginatiming-timing lang, kun may nabal-an siya nga paagi agud makabulig, dapat ipahibalo kag himuon sa madason nga panahon.
