KORONADAL CITY – Naka-full alert status sa subong ang bug-os nga probinsiya sang Maguindanao kag kaiping nga mga probinsiya matapos nga mapatay ang duha ka terrorist bombers nga nangagaw sang armas kag nagbato sa mga otoridad.
Sa interbyu sang Bombo Radyo Koronadal kay Lt. Col. Anhouvic Atillano, tagpamaba sang 6th ID Philippine Army, una nga naarestar ang duha sang gintingob nga pwersa sang PNP kag AFP sa Rajah Buayan, Maguindanao sang nagligad nga adlaw.
Naghana suno pa nga magpalagyo ang duha kag gin-agaw ang armas sang ila mga escort nga nagresulta sa kambyuhanay sang lupok nga ginkamatay man sang mga ini.
Ginkilala ang mga napatay nga sanday Rasul Dubpaleg kag Bhadz Dubpaleg nga mga miyembro sang Dawlah Islamiya Hasan Group kag core members sang BIFF Karialan-Bungos Faction.
Involbado man ang duha sa insidente sang pagpamomba sa Isulan, Sultan Kudarat, Midsayap, North Cotabato kag Southseas Mall sa Cotabato City.
Sa subong, indi lamang ang kapulisan ang nakaalerto kundi mangin ang mga suldado sa pagpatuman sang hugot nga seguridad sa posible nga retaliatory attack sang mga kaupdanan sang duha ka bomber.
