KORONADAL CITY – Madulom nga dalan kag madasig nga pagpadalagan sang salakyan pila lamang sa mga masami nga nagapanguna nga rason sang nagaluntad nga disgrasya sa bahin sang National Highway,Barangay Saravia, Koronadal City.
Ini ang nangin pahayag ni Ginang Myrna Calisnao, residente sang lugar sa interview sang Bombo Radyo Koronadal makaligad ang nagluntad nga aksidente kun diin gin-arado sang pick-up sang BFAR XII ang duha ka motorsiklo nga gintunaan sang kamatayon sang tatlo ka mga indibidwal.
Suno kay Manang Myrna,masami nga kabangdanan sang nagaluntad nga aksidente amu nga madulom nga parte sang dalanon sa national highway bangud suno pa sa malaka nga suga sa lugar dugangan pa sang madasig nga pagpadalagan sang mga salakyan nga nagaagi sa nasambit nga dalanon.
Gani,nagapangabay man ini sa tanan nga mga motorista nga naga biyahe kag masami nga nagaagi sa kalabaon sang national highway , Barangay Saravia, Koronadal City nga maghinay sa pagpadalagan kag maghalong samtang nagamaneho sang salakyan agud nga malikawan ang disgrasya sa dalanon.
Nahibaluan nga masami nga saksi si Ginang Calisnao sang nagaluntad nga disgrasya bangud may tindahan ini sa higad sang national highway.
