KORONADAL CITY – Ginaimbestigaran na sa subong sang mga otoridad ang pila ka mga local officials sang Marawi nga suno pa nagabaligya sang peke nga ID sa mga bakwit agud nga makalusot sa mga checkpoints pasulod sa mga probinsiya sang Sultan Kudarat, North Cotabato, Saranggani kag iban pa nga lugar sa Rehiyon dose.
Suno kay Armed Forces of the Philippines Chief of Staff Gen. Eduardo Año, ginabaligya ang mga peke nga ID sa kantidad nga P100-P300 nga amo ang ginakitaan sang mga opisyal kun diin posible suno pa nga mangin ang pila ka myembro sang Maute ang nakabakal sini kag nakasulod na sa pila ka mga lugar sa Mindanao agud nga makapalagyo sa mga otoridad.
Kaangot sini, nakig-angot na ang AFP sa PNP counterparts sa nasambit nga mga probinsiya agud nga matutukan ini, mas mapahugtan pa ang pagpatuman sang check points kag maberipikar labi na ang mga bakwit gikan sa Marawi nga yara sa nagkalain-lain nga lugar sa Region 12.
Aminado si Gen. Año nga sa tion nga mapabay-an ini dako ang posibilidad nga magaupod sa mga sibiliyan ang mga Maute terror group nga kalakip sa Marawi siege kag magahimo naman sang pagsalakay ukon kalakasan sa iban nga lugar sa Mindanao.
Kaangot sini, ginpasiguro an sang opisyal nga sa mas madali nga tion, matapos na giyera sa Marawi nga tuga sang mga ISIS linked Maute terror group.
Ginpasiguro man sini nga kontrolado na sang militar ang dako nga bahin sang Marawi.
