KORONADAL CITY – Patay ang isa ka lalaki makaligad nga mabunggoan sang motor kag nalapakan pa sang bus sa nagluntad nga aksidente sa Brgy. Saravia, siyudad sang Koronadal alas 6:15 kagab-i.
Ginkilala ang napatay nga biktima nga si Joemar Sagan, 21-anyos nga residente sang Sitio Tolosa, Barangay Saravia, Koronadal City
Base sa inisyal nga imbestigasyon, nagluntad ang aksidente sa atubangan sang Iglesia ni Cristo, Barangay Saravia, Koronadal City, kun sa diin una nga nabungguan sang Raider 150 nga ginamaneho ni Daniel Norr ang biktima nga nagatabok sa dalan.
Matapos nga mabungguan sang motorsiklo, nalapakan pa ini sang isa ka unit sang YBL nga ginamaneho ni Magdael Dante.
Nakit-an na lamang man sang mga residente nga yara na sa idalom sang unit sang Yellow Bus Line ang isa ka lalaki nga wala na sang kabuhi.
Padayon pa nga ginahibalo sang mga otoridad ang natabo sa nasambit nga aksidente kag kun sin-o ang magapanabat sa sini nga panghitabo.
