KORONADAL CITY- Ginkalipay sang mga himata, abyan kag nakakilala kay Fr. Teresito “Chito” Suganob sa probinsya sang South Cotabato ang balita nga buhi pa ini tubtob subong kag wala gin-utdan sang ulo sang Maute terror group nga nagapakilala nga local ISIS nga naghostage sa pari lakip na ang iban pa nga mga kristyano sa syudad sang Marawi.
Ini makaligad ginkumpirmar sang isa ka residente sang Marawi City nga nakaistorya suno pa sini ang isa ka myembro sang Maute nga nagtawag ini sa simbahan kag ginsiling nga buhi pa ang mga bihag apang posible patyon sa tuon nga sudlon sang mga suldado ang Cathedral nga ginahamtangan sang mga bihag.
Madumduman nga una na nga nagwa sa report nga gin-utdan sang ulo si Fr Chito nga tuman nga ginakasubo sang iya pamilya.
Sa subong nagpamalibad pa sang dugang nga pahayag ang pamilya Suganob sa banwa sang Norala South Cotabato angot sa nasambit nga balita.
Samtang padayon naman ang ila panawagan sang pagpangamuyo sa kaluwasan ni Fr. Chito kag sa mga kaupdana sini tubtob mahilway halin sa mga kamot sang terorista.
