Ginpaathag ni Kapitan Eleanor Borje sang Barangay Zone IV nga kinahanglan sundon sang mga barangay official ang desisyon sang Kongreso kag ni Pangulong Ferdinand “Bongbong” Marcos Jr. may kaangtanan sa posible nga postponement sang BSKE 2026.
Sa interview sang Bombo Radyo Koronadal, iya ginpahayag nga madamo pa ang nagapadayon nga diskusyon parte sa sini nga isyu, gani kinahanglan maghulat sa pinal nga desisyon sang mga nagapadumala sang proseso.
Nagpabutyag man si Borje sang iya pagpabor sa pagpadayon sang BSKE agud mahatagan sang kahigayunan ang mga pumuluyo nga makapili sang bag-o nga mga lider sa ila barangay.
Samtang, gin-awhag niya ang mga incumbent barangay officials nga magpadayon sa pagserbisyo kag pagtuman sang ila mga katungdanan, samtang ginahulat ang desisyon kun ipadayon ukon ipostpone ang eleksyon.
Nanawagan man siya sa mga pumuluyo nga mangin responsable sa pagpili kag suportahan ang mga lider nga may maayo nga serbisyo kag prayoridad ang kaayuhan sang komunidad.
