KORONADAL CITY – Tigayon nga nagsungka sa mga otoridad ang 28 ka mga katapo sang New People’s Army sa banwa sang Tupi, South Cotabato.
Ang nasambit nga pagsungka sang mga ini ang gintambongan sang mga local government kag police officials sa pagpanguna nanday Mayor Romeo Tamayo kag Provincial Police Director Col. Jemuel Siason kun sa diin ila ginsaksihan ang pagsungka sang mga ini nga ginakabug-osan sang 4 ka kababayehan kag 24 ka kalalakihan.
Ila man nga ginsungka ang mga matag-as nga mga kalibre sang armas luthang lakip na ang pila ka improvised weapons, pistola kag mga revolver bilang kabahin sa bulig nga mahimo nila mabaton sa gobyerno.
Nangin rason suno pa sang pagsungka sang mga ini amo ang kakapoy sa kabukiran kag pagpakigbato sa kawsa nga wala nila nahangpan.
Sa isa ka pamulong-pulong, ginpahayag ni Mayor Tamayo nga nakahanda ang iya LGU nga buligan ang mga ini kun sa diin kalakip sa mga ayuda nga mahimo nila matanyag amo ang sa bahin sang edukasyon kag obra.
Igapaidalom naman ang mga ini sa E-CLIP program agud mahatagan sang tsansa nga magpangabuhi nga normal.
