KORONADAL CITY- Ginbuyagyag sa Bombo Radyo Koronadal ni 33rd Infantry Makabayan Battalion commander Lt. Col. Harold Cabunoc nga madamo pa sang mga dumuluong nga mga terorista ang nakasulod sa Mindanao partikular na sa probinsya sang Maguindanao.
Ini ang kasunod sang pag anunsyar nga Indonesian suicide bombers ang yara sa likod sang Sulu twin bombing kun sa diin sa probinsya sang Maguindanao ginatutukan man nila ang paglagas sa Indonesian terror group nga Indong-Indong.
Nahibaluan nga tinutuyo sang nasambit nga grupo nga naga operate sa General Salipada K Pendatun kag Liguasan Marsh nga magpalapnag sang kinagamo kag mas painiton pa ang away pamilya ukon rido sang mga armado nga grupo agud magpinatyanay ang mga ini.
Dugang pa nga ginahanas man nila sa paghimo sang bomba ang ila mga ginarecruit nga mga kabataan ukon indibidwal.
Luwas sa mga terorista nga Indonesians nga nakasulod sa Maguindanao, ginabantayan man nila ang isa pa ka Singaporean terrorist nga si Jaoia nga ginapatihan nga may alyansa sa Islamic State of Iraq and Syria o ISIS.
