Ginpabutyag sang isa ka overseas Filipino worker (OFW) sa Australia nga ang impeachment trial ni Vice President Sara Duterte isa ka mas politikal nga proseso kag indi lamang constitutional process, gani dapat magpokus ang duha ka kampo sa mga isyu kag ebidensya nga may direkta nga kaangtanan sa kaso.
Sa interview sang Bombo Radyo Koronadal, ginpahayag ni Denmark Suede, Bombo International News Correspondent to Australia, nga bangod politikal ang kinaiya sang impeachment, tuman ka teknikal ang ginahimo nga pagdepensa sang legal team ni Vice President Sara Duterte.
Suno sa iya, samtang padayon nga nagasalig ang depensa sa teknikal nga mga argumento, ang House prosecution panel naman nagatinguha nga mapalig-on ang ila kaso pinaagi sa pagpresentar sang mga ebidensya nga may mabaskog nga legal nga basehan.
Ginpahanumdom man ni Suede nga mas mangin episyente ang impeachment proceedings kon malikawan ang malawig nga diskusyon sa mga isyu nga indi sentro sa reklamo kag tutukan ang mga pamatuod nga makabulig sa impeachment court sa paghimo sang desisyon.
Dugang pa niya, posible man nga indi maglawig sang pito ka bulan ang impeachment trial bangud sang nagadugang nga presyur sa Senado kag sang nagahilapit nga preparasyon para sa 2028 national elections.
