KORONADAL CITY – Nagapamatok ang pamilya sang isa ka Overseas Filipino Worker (OFW) nga yara sa “brain dead” condition subong sa isa ka hospital sa Kuwait nga ibaligya ang internal organs sini.
Ginkilala ang OFW nga si Emily Puntalba Tugade De Leon, 41-anyos nga residente sang Barangay Banawag, President Quirino, Sultan Kudarat kag 12 ka tuig na nga nagatratabo sa nasambit nga pungsod.
Sa eksklusibo nga interbyu sang Bombo Radyo Koronadal kay Ian Tugade De Leon, bata sang OFW, sang Marso 12 gindala sa Ministry of Health Mubarak Al-Qadir Hospital si Emily bangud sa nakita nga blood clot sa utok sini.
Gilayon nga ginpaidalom sa operasyon si Emily apang pagkaligad sang 3 ka adlaw ginpahibalo sa ila nga wala ini naka-survive kag yara sa “brain dead condition” kun diin mga apparatus na lamang ang nagabuhi sa iya.
Rason nga ginrekomendar suno pa sang doctor sini nga ibaligya ang mga internal organs ni Emily antes siya igapauli sa pungsod.
Apang, nagapamatok ang pamilya kag sa subong nagahingyo sang bulig nga mapadasig kuntani ang pagproseso sa pagpauli sang lawas sini.
Nahibaluan nga wala man nagpabaya ang employer sini kag nakahanda nga akuon ang gastos sa hospital kag pagpauli sini sa pungsod.
Gilayon naman nga nag-aksiyon ang OWWA-12 kag ginapalab-ot ang reklamo sang pamilya sa Philippine Embassy sa Kuwait.
Nagpromisa naman si OWWA-12 Regional Director Marilou Sumalinog nga pagabuligan ang pamilya.
