Posible nga mag-untat na sa hog raising ang pila ka hog raisers sa Banwa sang Polomolok, South Cotabato kon magapabilin nga wala sang pagbag-o kag konkreto nga aksyon sa mga problema nga nagapabudlay sa industriya.
Ini ang ginpahayag ni Amy Jean Jugador, isa ka hog raiser, sa interview sang Bombo Radyo Koronadal, nga nagapahayag sang iya pagkadismaya sa padayon nga kakulang sang sabat sa ila mga panawagan.
Suno kay Jugador, naganubo na ang iya pagsalig sa mga nagahimo sang desisyon kag mga mamamalidha bangud daw wala gihapon napamatian ang mga problema sang mga nagapangabudlay sa hog industry.
Gindugang niya nga indi lamang ang ila pangabuhian ang nakapusta kundi pati ang palaabuton sang lokal nga agrikultura kon magapadayon ang kakulang sang suporta sa mga lokal nga hog raisers.
Ginkwestyon man ni Jugador kon ngaa kinahanglan magsalig sa imported nga karne kon mahimo man nga suportahan kag palig-unon ang lokal nga produksyon sang baboy.
Bangud sini, ginpahayag niya nga kon wala gihapon sang makita nga konkretong solusyon kag pagbag-o sa industriya, posible nga untatan na lamang niya ang pag-aalaga sang baboy.
