KORONADAL CITY – Yara na sa masobra 440 ka mga returning OFWs (ROF) kag LSI ang napauli sang Koronadal LGU makaligad ma-stranded ang mga ini sa nagkalain-lain nga lugar.
Suno kay Balik Koronadal adhoc team head secretariat Elric Batilaran, nagikan ang pinakaulihi nga batch sang mga nagpauli halin sa Iloilo kag Cagayan de Oro kun sa diin nag-abot sila takna alas 11 sang gab-i sa siyudad kag kasubong sa iban, ginpaidalom sa briefing sa health kag quarantine protocols.
Ginpasiguro man sini nga bastante pa ang mga lugar sa quarantine facilities, apang ila na nga ginapakig-angotan ang mga hotel kag pension house facilities kun mahimo sila himoon anay nga quarantine facilities.
Samtang ginpahayag man sini nga sa masobra 440 nga mga OFWs, 10 tubtob 20 porsyento sa mga ini ang wala nalakip sa listahan sang magapauli sa siyudad, gani ini ang ila nga gina-validate kag ginatutokan agud mahibaloan kun taga-diin ang mga ini.
Ginalauman nga yara sa kapin 2,000 pa ka mga returnees ang ginapaabot sang local government unit gani tuman man ang ila pagpaningkamot agud maakomodar ang mga ini sa ila pag-abot sa siyudad.
