Nagumpisa na ang plano para malikas ang ginatos ka barko kag kapin 11,000 ka seafarers nga na-stranded sa Gulf region kasunod sang ceasefire sa tunga sang Iran kag Estados Unidos.
Suno sa International Maritime Organization (IMO) sang United Nations, nakig-angot na sila sa mga barko nga yara sa lugar agud sugdan ang luwas nga paglayag paggwa sa Strait of Hormuz.
Ginsiguro man sang IMO nga mangin luwas ang himuon nga evacuation para sa mga stranded nga barko kag mga tripulante sa rehiyon.
Ginpatigayon ang masangkad nga operasyon sa pakigbuligay sang Iran, Oman, Estados Unidos, kag iban pa nga mga kompanya.
Suno naman sa Ministry of Defense sang Oman, himuon ang evacuation sa paagi nga phased ukon hinay-hinay nga paglikas agud malikawan ang posible nga pagbangga sang mga barko sa amo nga kadagatan.
Sa karon, indi anay gamiton ang Traffic Separation Scheme ukon ang panguna nga shipping route sa Strait of Hormuz. Sa baylo, duha ka temporaryo nga ruta sa north kag south nga bahin sang amo nga agyanan ang gamiton para sa mas luwas nga paglikas sang mga barko.
Ang Traffic Separation Scheme gintukod sang International Maritime Organization sang 1968 agud maorganisar ang pag-agi sang mga barko sa tunga sang kadagatan sang Iran kag Oman sa Strait of Hormuz.
