KORONADAL CITY – Lubos ang pagpasalamat sang isa sa 17 ka mga estudyante nga na-trap sa Mindanao State University (MSU) Marawi makaligad nga ma-rescue matapos ang duha ka adlaw kag nakapauli na kaupod ang iya pamilya.
Sa interbyu sang Bombo Radyo Koronadal kay Dey Ann Castillon, nga residente sang Tacurong City, nagapatigayon sila sang review sang matabo ang pag-atake sang Maute terrorist sa nasambit nga lugar.
Nasaksihan niya suno pa gikan sa 2nd floor sang ila nga ginapanaguan ang mabaskog nga kalibre sang armas kag ang natabo nga pagpangsunog sang mga edfisyo kaupod na ang simbahan.
Dako nga bulig suno pa ang pagsuksok nila sang hijab agud nga wala sila nasakit sang mga terorista.
Sa iya pagpati kag mga kaupdanan sini, indi na sila mabuhi pa bangud sa natabo.
Apisar nga naluwas na sila magapabilin ang trauma nga ila nga naeksperiensiyahan.
Kadungan sini, nagpanawagan naman si Castillon sa mga pumuluyo nga magpangamuyo para sa kaluwasan sang iban nga na-trap sa Marawi labi na ang mga hostages sang mga terorista.
