Nagpromisa sang balos si Russian President Vladimir Putin matapos niya akusaran ang Ukraine sa madug-on nga pag-atake sa isa ka student dormitory sa okupado nga bahin sang sidlangan nga Ukraine.
Suno kay Putin, anum ka tawo ang napatay kag 39 ang napilasan sa overnight drone strike sa Starobilsk, samtang may 15 pa ka ginapangita.
Ginpahayag sang presidente nga ginpatigayon ang atake gamit ang 16 ka drones sa tatlo ka wave kag ginsugo niya ang militar sang Russia nga magpreparar sang balos.
Apang ginpahayag sang militar sang Ukraine nga ila gintarget ang headquarters sang elite Rubicon drone unit sang Russia sa amo nga lugar, kag gin-akusaran nila ini nga unit sa masami nga pag-atake sa mga sibilyan kag imprastraktura.
Ginpahayag man ni Putin nga wala sang military ukon intelligence facilities sa palibot sang natiruhan nga dormitory, kag ginpanginwala niya nga aksidente lang ang hitabo ukon resulta sang air defense systems.
Ginpakita sang state media sang Russia ang isa ka 19-anyos nga estudyante nga si Diana Shovkun nga naka-angkon sang head injuries matapos maigo sang natiphag nga konkreto.
Samtang, suno kay Ukrainian President Volodymyr Zelensky, may lain pa nga drone strike sa gin-okupar nga bahin sang Kherson nga target sang Russian security service, nga ginreport nga nagresulta sa mga 100 ka casualties sa Russian side.
Wala pa sang opisyal nga kumpirmasyon ang Russia sa iban nga detalye sang Ukrainian claims, apang nagapadayon ang magkatuhay nga pahayag sang duha ka pihak samtang nagadugang ang tensyon sa giyera nga nagluntad halin 2022.
